Aprelin 5-də İqtisadi İnkişaf Nazirliyinin Sahibkarlığa Kömək Milli Fondu "Sahibkarlığın inkişafına dövlət dəstəyi" mövzusunda növbəti tədbirini Mingəçevir şəhərində keçirmişdir. Tədbirdə Mingəçevirdə və ətraf rayonlarda fəaliyyət göstərən 80-dən çox sahibkar iştirak etmişdir.
Tədbirdən əvvəl Mingəçevirdə Sahibkarlığa Kömək Milli Fondunun güzəştli kreditləri hesabına maliyyələşdirilmiş "Mingəçevir İzolit" ASC-nin polietilen boru istehsalı müəssisəsinin fəaliyyətinə və müasir çörək zavodunun tikinti işlərinə baxış keçirilmişdir.
"Sahibkarlığın inkişafına dövlət dəstəyi" tədbiri çərçivəsində Sahibkarlığa Kömək Milli Fondu tərəfindən Mingəçevir şəhərinin iqtisadi potensialının reallaşdırılması istiqamətində müzakirələr aparılmış və Fond tərəfindən prioritet hesab olunan müasir iplik və parça istehsalı fabrikinin, kiçik həcmli tikinti materialları istehsalı sahəsinin yaradılması üzrə hazırlanmış nümunəvi investisiya layihələrinin təqdimatı keçirilmiş, kiçik həcmli investisiya layihələrinin ümumi dəyərinin 100%-dək hissəsinin dövlətin güzəştli kreditləri hesabına maliyyələşdiriləcəyi bildirilmiş, sahibkarlara nümunəvi layihələr və metodiki materiallar paylanmışdır.
Mingəçevir Şəhər İcra Hakimiyyətinin başçısı Niyazi Bayramov ölkədə quruculuq-abadlıq işlərinin geniş vüsət aldığını, digər bölgələrdə olduğu kimi Mingəçevirdə də yeni istehsal, emal və infrastruktur sahələrinin yaradıldığını qeyd etmişdir. Bildirilmişdir ki, regionların iqtisadi mənzərəsinin dəyişməsində, istehsalın genişlənməsində uğurla həyata keçirilən regional dövlət proqramlarının xüsusi əhəmiyyəti vardır.
İqtisadi İnkişaf Nazirliyinin Sahibkarlığın inkişafı siyasəti şöbəsinin müdir müavini Elçin İbrahimov və Aran regional bölməsinin müdiri Elbrus Hüseynov qeyri-neft sektorunun inkişafının sürətləndirilməsi, əlverişli biznes və investisiya mühitinin formalaşdırılması nəticəsində ölkənin davamlı sosial-iqtisadi inkişafına nail olunduğunu, sahibkarlıq fəaliyyətinin genişləndiyini vurğulamış, "Azərbaycan Respublikası regionlarının 2009-2013-cü illərdə sosial-iqtisadi inkişafı Dövlət Proqramı"na uyğun olaraq, Mingəçevir şəhərində həyata keçirilən tədbirlər və görüləcək işlər barədə məlumat vermişlər.
Sahibkarlığa Kömək Milli Fondunun icraçı direktoru Şirzad Abdullayev bildirmişdir ki, regionlarda aqrar sahə ilə yanaşı, sənayenin inkişafı, bu sahədə müasir texnologiyaların tətbiqinə əsaslanan rəqabətqabiliyyətli və ixracyönümlü layihələrin maliyyələşdirilməsi Fondun fəaliyyətinin əsas istiqamətlərindəndir. Qeyd edilmişdir ki, 2013-cü ilin ötən dövrü ərzində Sahibkarlığa Kömək Milli Fondunun vəsaitləri hesabına sahibkarlıq subyektlərinin 669 investisiya layihəsinin maliyyələşdirilməsinə 83 milyon manat güzəştli kredit verilmişdir. Bu investisiya layihələrinin reallaşdırılması 2500-dən çox yeni iş yerinin yaradılmasına imkan verir.
Sonra Mingəçevir şəhərinin sənaye potensialının reallaşdırılması ilə bağlı müzakirələr aparılmış, sahibkarları maraqlandıran suallar cavablandırılmışdır.
Tədbir çərçivəsində Mingəçevir şəhəri və ətraf rayonlarda fəaliyyət göstərən 36 sahibkar 1,3 milyon manat güzəştli kredit almışdır. Bu kreditlər hesabına 80 yeni iş yerinin yaradılması nəzərdə tutulur. Verilmiş kreditlər əsasən, ərzaq məhsulları, tikinti materialları istehsalı sahələrinə, heyvandarlığın inkişafına yönəldiləcəkdir. Ümumiyyətlə, indiyədək Aran iqtisadi rayonunda fəaliyyət göstərən sahibkarlıq subyektlərinin 5400-dən çox investisiya layihəsinin maliyyələşdirilməsinə 273,7 milyon manat güzəştli kredit verilmişdir.